學業壓力

返學放學﹑做功課﹑補習﹑準備測驗考試，要做嘅嘢多到數唔曬，又擔心自己嘅表現唔好。你會唔會都有試過有呢啲經歷？

我哋可以試吓：

• 整個清單俾自己：將今日計劃要做或者想做嘅大小事都寫低，之後再嘗試拆開佢哋做細啲嘅部分。例如：「睇一本書」可以變做「睇呢本書嘅第幾個章節」。咁樣可以俾我哋更加清晰咁睇到每一步點做，令目標感覺比較容易達到。

• 我哋都可以估計一吓每個項目可能要用幾多時間完成，再按先後次序去做。（記住：呢個時間只係一個粗略估計，係絕對可以就住情況作出改變！）

• 嘗試將溫書嘅時間設為25分鐘，然後休息5分鐘，跟住再溫25分鐘，如此類推。

• 預留時間俾自己放鬆吓 （例如運動） ，同埋有充足嘅睡眠，等大腦有足夠嘅時間休息，休息得夠唔夠都會影響學習表現。