理念

headwind 迎風」係香港大學精神醫學系「UMWeltH」嘅其中一個計劃。21世紀嘅青年精神健康正面對緊前所未有嘅挑戰。世界同社會嘅轉變,實在令我哋不知所措。「 UMWeltH」希望可以結合唔同領域嘅專業,同埋「你」嘅參與,一齊守護年青人同大衆嘅精神健康。除咗分享適合嘅資訊同提供支援,我哋都希望可以幫助大家有更好嘅心理狀態,一齊應對生活嘅各種挑戰。 

 

UMWeltH 一詞源於德文嘅 Umwelt,意指 「我哋嘅當下世界」

U = Youth 青年,同「你」(你,同我哋每一個,都咁重要)

U M Welth= Youth Mental 「Wealth」 青年精神財富(術語來自Bebbington et al., 2008, 以強調年青人嘅精神健康對社會整體發展嘅重要性)
U M H = Youth Mental Health 青年精神健康

所以

UMWeltH =代表住我哋當下嘅世界、年青人、青年精神財富、青年精神健康,同對「每一個人」嘅關心

青年精神健康

青年係社會未來棟樑,面對社會事件以及疫情嘅挑戰,我哋更應該關注青年精神健康。現有嘅社會資源,係咪足夠支援青年嘅精神健康?我們嘅服務,同青年嘅需要,係咪有好大落差 ? 

 

有研究指,七成半嘅精神病病發期喺24歲之前,並會持續影響患者往後嘅生活 。香港大學精神醫學系喺2020年嘅研究發現,喺社會事件同疫情嘅影響下,25歲以下嘅青年有較顯著嘅創傷事件經歷、創傷後壓力及抑鬱症狀,但相較於其他年齡層嘅受訪者,青年亦都係最難接觸到常規服務嘅一群。

 

據統計,喺香港約有650,000名介乎15歲至25歲嘅青年,當中有一成半(約100,000名)患有可診斷嘅精神健康問題,部分青年甚至有明顯嘅自殺風險。

 

但係,社會上似乎提供唔到足夠嘅服務畀呢班有精神健康需要嘅青年。

青年精神財富

財富可以係金錢,都可以係世上任何你所擁有嘅外在物質,但精神財富係一樣你睇唔到,摸唔到,卻比任何外在物質更加珍貴嘅財富。當基本生存嘅需要被滿足之後,一個人能唔能夠感受到幸福,關鍵在於能唔能夠建立到精神財富。

 

今時今日嘅青年普遍喺比較安穩嘅情況下出生同成長。千禧之後,世界卻出現咗前所未有嘅轉變,難以適應實在係人之常情。要幫助青年面對眼前嘅挑戰,走過失落、傷心、難過嘅困擾,必須盡快鞏固青年精神健康,為佢哋建立精神財富。咁樣嘅話,無論佢哋面對點樣嘅人生,佢哋都可以從容咁面對,有能力應對外在一切嘅負面情況。

青年精神財富與社會

要推動社會進步,人才、金錢、勞動力、知識等,都係重要嘅資本。但你有無諗過,其實精神健康都係社會發展嘅重要資本?而鞏固青年嘅精神健康,同時都係保護同支援佢哋為社會持續貢獻。

 

精神資本包括認知同情緒管理。一個人嘅學習能力、處理情感嘅能力、社交能力、解難能力等,都會影響佢點樣貢獻社會同提升生活質素。試諗諗,如果社會中大部分人都受住情緒困擾,自然都會影響佢哋日常嘅工作同社交生活。但如果能夠為社會大部分人建立精神財富,唔單止可以提升個人潛質嘅發展、工作效率同建立社交關係,亦都有助推動社會發展,提升社會資本。

 

青年將會係未來社會嘅棟樑,因此社會一定要提供足夠嘅精神健康服務,及早介入同處理青年精神健康問題,共同提升青年嘅精神財富,提升社會財富。

@2020 UMWeltH. Department of Psychiatry, The University of Hong Kong. All Rights Reserved.